Car通:日產TiidaAero-sport
日產自抄 十零萬嘆Fairlady
坦白講,我以前對車真係一竅不通,現時都係邊做邊學,唔識就問,好似日產Tiida咁,我印象中佢只係一部細車,斷估部車細馬力應該有限;而且仲係四門房車㖭,就算話抄Fairlady都好,點都想像唔到佢可以學「淑女」咁跑得起!接觸過之後就發現,呢個翻版「淑女」真係跑得起!
記者:梁美甜
攝影:楊錦文
模特兒:Victoria
全新日產TiidaAero-sport四門房車講到明係參考自家品牌超級跑車Fairlady350Z嚟做個車身包圍,Fairlady咁跑得,佢咁樣參考法,擺到明係要部四門房車跑得起?!單看外表,都算有啲跑車味,但就唔知會唔會「華而不實」,於是就膽粗粗「跑」一轉!
■當然唔可以同Peugeot彎路之王比,但以平一半有多價錢都有唔錯嘅掟彎咬地感覺,算係咁啦!
我自問駕駛技術只屬初班,但Tiida嘅操控都算容易,好快就摸到操作方法同模式,當然部車嘅XtronicCVT無段變速自動波箱發揮唔少功用,事關佢配合埋CAMBUS電腦系統同HR15DE嘅引擎同跑車懸掛系統,唔使我煩自動曉用最佳波段行車,直路轉彎反應同抓地力都唔錯;路訊清楚到俾我感覺似揸緊跑車咁!
■驟眼望以為Tiida很細小,但內櫳其實比想像闊落好多,呃晒!
■全車都有包圍,而且仲有定風翼,跑味出晒嚟;加上頭燈線條銳利,仲多份英氣㖭!
上一代嘅日產Tiida已經算係一部線條唔錯嘅四門房車,但係外觀上就覺得部車好細,總覺得坐上去實好逼、部車會好慢咁。點知新款Tiida全車做晒大包圍,仲要係跑車式㖭;好似車身前擾流器同埋前電鍍裝飾、兩側裙腳、車尾擾流器同埋車尾定風翼等,上一代包圍都有,不過係Option,新款就有齊晒唔使加錢之餘仲好有跑味,賺晒!
■個尾箱冚細細,打開居然有成467公升容量,兩個Victoria都「收」得落!
■見5呎8嘅Victoria可以攤喺度就知車廂幾寬敞啦!
Tiida個樣望落好似係細細部咁,查實完全係錯覺,事關內櫳闊落得很,有成2,035mm長,單係後座坐3個6呎高妹都咁舒服,6呎高妹難搵,兩個大隻佬易搵,齊齊坐去健身都唔會逼親!不過部車始終得嗰1,500c.c.,坐幾件有份量人物之後,部車跑極有限,行得靈巧都叫賺咗!個尾箱同樣俾個尾冚造成錯覺,以為冚細箱小,殊不知有成467公升,大到可以擺三副FullGear嘅高爾夫球球具㖭!靚女Victoria更笑說兩個匿埋玩包剪囗都得喎!
美甜:「比我想像中好揸,而且細c.c.慳番唔少牌費同油費,環保得嚟都算OK。」
市場主任Vincent:「房車格坐得舒服但又有跑味,咁嘅價錢有咁嘅質素算係咁啦!」
要數最得我歡心嘅都係佢夠慳,1,500c.c.細車無論牌費油費都少,加上佢副HR15DE全鋁合金引擎,可以降低磨擦力同埋提高熱能效應,以$13.7一公升油咁計,Tiida燃油費大約係每公里7毫5,環保得嚟又慳到盡;對係慳妹又要型嘅我至啱!
引擎:1,498c.c.直列4汽缸16氣閥,DOHC連CVTC
馬力:109ps/6,000rpm
扭力:15.1kg-m/4,400rpm
傳動:XtronicCVT無段變速自動波
查詢:合誠汽車(28035333)