每逢有大型選舉，廉署都會收到大量選舉投訴，但當中唔少都係性質輕微嘅投訴。廉署審查貪污舉報諮詢委員會主席施祖祥噚日出席廉署一年一度記者會時替廉署抱不平，話委員會睇到唔少選舉投訴只係涉及微小嘅選舉開支，又或者印宣傳海報數目有出入。

盼政府檢討制度

佢話最印象深刻嘅一單case，廉署花咗大量人力物力同時間去調查，最後竟然發現只係涉及計少兩元選舉開支。佢話呢個係資源運用問題，覺得廉署咁做係大才小用，政府應該檢討呢個制度，「係咪要將所有嘅case都交晒畀廉署？係咪有其他方法去處理？例如將性質輕微嘅個案交由選管會自行處理，等廉署可以集中資源去處理嚴重case。」
但佢坦言，呢個問題需要好長時間討論，包括點樣訂出界線，涉及幾多選舉開支嘅投訴就交畀廉署跟進等。曾任港英憲制事務司嘅施祖祥噚日講咗個爛gag，話舊年選舉只有一些補選活動時，忽然強調係「補選」而唔起「普選」，惹來在場人士一陣笑聲。