上星期四，「傳媒教父」──教訓傳媒之父李超人，旗下檔和黃趁開AGM之日，順便宣布前和黃大班、超人頭馬之一嘅馬世民（SimonMurray），因為「事務繁忙及經常出外」，冇時間履行和黃獨立執行董事嘅職務，所以即日起辭職唔do，結束同超人廿三年嘅關係。

顯身手大好時機

咪以為老馬真係忙到要同超人割席，查實當晚英國Vodafone就出咗個新聞稿，話請咗馬世民做非執行董事，7月1日起生效，只不過，當晚香港傳媒專注聽超人講股市泡沫、話傳媒無中生有，冇時間睇張新聞稿咋！
老馬過檔VOD，係咪等如同超人脫離關係？即係咁，VOD𠵱家個話事人係前滙豐大班龐約翰，佢同超人情同幾十年黃紙兄弟，市場一直流傳，VOD買完超人嘅印度HE之後，仲想買佢歐洲嘅3G業務（但有傳話係幫超人脫身囉），但龐主席本身唔見得有咩電訊經驗，所以，佢搵老馬入board，估計有以下幾個理由：

功勞歸邊冇佢份

首先，繼當年幫超人成功向滙豐買到和黃，龐生可能再想伸出上帝之手幫超人，以VOD牌頭搵極具電訊經驗嘅老馬嚟搞就最好，幾無間feel㗎！又用個直接啲嘅角度諗，江湖一直傳聞老馬當年同超人不歡而散，呢鋪係顯身手嘅最好機會，話畀超人知電訊生意應該點做。
至於另一個可能，就係龐生純粹比超人識貨，佢響新聞稿都講，係睇中老馬豐富嘅亞洲區電訊經驗，呢個會係VOD重要嘅資產云云，大家鍾意揀邊個理由嚟信都得！
咁老馬同超人點解會積怨？應該唔關錢事，純粹係面子同啖氣！
當年超人最風光嘅和記電訊江山，就係由老馬同衛斯文呢兩位「電訊教父」打出嚟，買入Orange前身嘅Rabbit，甚至超人引以為傲嘅赫斯基，都係佢兩位眼光獨到，但後來大家唔啱嘴形，於是兩人自立門戶成立Distacom，97年推出SUNDAY同超人一較高下。
最可惜，後來超人賣橙締造千億神話，冇credit佢兩位，如果你係老馬，你會因為咩原因入VOD呢？
[email protected]