韓劇「收視女王」女星孔孝真自前年拍完劇集《嫉妒的化身》就未有新作，只係間唔中出席品牌活動，不過去年佢就曾經襲港，擔任好友孔劉粉絲見面會嘅嘉賓。

而近日孔孝真就邀約不斷，日前有報道指孔孝真有望接拍韓劇《三流之路》編劇嘅新作《山茶花開時》，其所屬事務所就表示「討論中」。今日再有報道指孔孝真將與男星金来沅合作新片《最普通的戀愛》，似乎休息一年多嘅孔孝真將同步回歸公仔箱及大銀幕。

據悉，《最普通的戀愛》講述30多歲男女間嘅現實愛情故事，係一齣溫馨浪漫嘅作品，預計於今年冬天開機，有指孔孝真及金来沅已經調整行程準備投入新片拍攝。假如兩人都落實演出，將係兩人繼2003年韓劇《雪人》後，相隔15年後再合作，令粉絲都相當期待。

更多韓流，喺晒《娛果》
http://fb.com/appledailyent