胡杏兒、范振鋒、李思欣噚晚喺奧海城出席電影《虎膽追兇》首映禮，杏兒同胡定欣、胡蓓蔚、李施嬅、姚子羚等「胡說八道會」成員，間唔中都會一齊去旅行，兼會影輯泳裝寫真，杏兒話今年想再去影：「好耐無影喇！我同佢哋講，我生完係影就快啲，如果唔係我又唔知幾時肥晒，不過大家都好忙，約食飯都好難，如果係影，喺香港影就最方便。」

杏兒又講到囝囝Brendon最近出咗兩隻牙仔，佢笑話：「好開心，不過佢o依家好似條鯊魚咁成日咬人，見到人肉就咬，好彩食得瞓得冇扭計，22磅重，見到佢大脾就想搣佢。」會唔會準備再生多個?杏兒話：「手頭都有啲工作，要完成晒先，不過好多人都話豬係好年，我都希望啦！」

另外，李思欣以前都成日放泳裝照上網分享，佢笑話係平腳多，比堅尼一早遺失咗，老公范振鋒即刻插嘴話：「：「少布，巾驚佢凍親嘛！」李思欣大爆：「兩個人嘅時候，尺度可以放寬啲，影咗啲勁嘅相，佢叫我唔好放上網，身材唔係勁，但有Deep V、心型胸；一有人嘅地方，佢即刻叫我拉高啲。」范振鋒笑話：「佢成日揀泳衣問我靚唔靚，我見呢度有個窿嗰度有個窿，我就會同佢講唔靚好cheap。」

問到范振鋒公司旗下女藝人係咪都要走同一個方向?佢話：「o依家啲女仔好鍾意影水着相放上網，唔知係咪因為呢啲相多人like，不過公司唔係咁諗，有實力係唔使靠呢啲！之前見有個女仔影鄔低身嘅相，我都叫佢删咗去。」

精選娛聞，喺晒《娛果》
http://fb.com/appledailyent