謝霆鋒今日31歲生日，回復自由身嘅佢要努力工作養一對囝囝。自從宣佈離婚後，霆鋒同張栢芝開始各自搵食過新生活，栢芝日前低調由內地返港，準備湊囝囝Lucas開學，而霆鋒前晚同噚晚就一連兩晚喺內地演唱，銀至上。
霆鋒噚晚同羅志祥、蔡依林同莫文蔚等喺上海開騷，中港台歌手難得聚集同一舞台，觀眾反應熱烈，大會仲安排霆鋒唱壓軸。
而霆鋒前晚就喺重慶出席咗另一個演唱會，佢入鄉隨俗用重慶話講「大家好」冧粉絲，之後又唱咗兩首歌，歌迷為冧偶像，仲送上生日蛋糕，又齊齊向佢送祝福，霆鋒感動到90度鞠躬答謝，心情大靚嘅佢，全程冇提家事。

Lucas識人

鋒芝嘅離婚協議講明，兩人會共同管養囝囝，但栢芝就要兩個仔跟佢生活，噚日下晝5點半左右，栢芝帶咗兩個仔同保母去陽明山莊嘅超級巿場掃貨。栢芝抱住光頭嘅Quintus，大仔Lucas就幫手推購物車埋單。
行超級市場時，Lucas除咗手多多摸貨品之外，仲笑騎騎咁對住收銀姐姐，到人鬼咁開心。精靈嘅Lucas發現記者鏡頭，仲好友善擺甫士任影唔嬲。心情唔錯嘅栢芝買咗大堆食物，不過見到記者係咁影，佢即刻背向鏡頭，其後由保安安排佢哋由後門離開。