在香港買樓動輒幾百萬，去少些日本都無用。本地藝團「漫遊樂團」正舉辦「北角睇樓團」，帶港人參觀離地458米的「碌架山一號」、標榜「五星級的家：逼櫃園」的示範單位，無殼蝸牛不用付首期、不用供樓，就可找到心目中筍盤。北角睇樓團策展人及藝術家笑言：「唔喺真係帶大家睇樓」，展覽除了諷刺香港越來越擠逼的居住環境，也盼港人思考「到底買樓喺咪咁重要？」

記者：譚靜雯

展覽打正旗號叫「北角睇樓團」，館內每一件作品、佈置都參考港人睇樓作藍本。參觀示範單位前，大家可先取一本「售樓書」，樓書製作精美，甚至跟足一手樓條例，有齊樓盤平面圖、各個「樓盤」的詳細介紹，包括地段優越、坐落北角半山、但離地458米兼一梯四伙的「碌架山一號」，或五星級的家「逼櫃園」。

走進示範單位大門，映入眼簾不是大露台、不是無敵海景、卻是一大幅「地產廣告」。名為「御。羅生門」的裝置藝術。作品模仿地產舖的街招，讓參觀者反思到底「點解買樓？」、「點解唔買樓？」買樓因為「買舊磚好過買股票」、「有父幹」？或唔買樓是「買樓不是人生的全部」、「等中六合彩」？

另一個「示範單位」北角碌架山一號，有份參與創作的80後藝術家高嘉莉稱，作品透過一張「塞滿」大大小小物件的碌架床，反映香港擠逼的居住環境，「一張碌架床除了瞓覺、食飯、小朋友玩、沖涼等全部嘢一日嘅活動就喺呢度發生。住劏房嘅家庭，每日面對就係咁嘅環境。」

藝術家黃偉研也憶述，從小在廉租屋長大，200呎單位與5名家人同住，「嗰時我都係瞓碌架床，係床做功課、玩，嗰時其實好開心。」但他認為最諷刺是現時社會進步，「點解住屋問題係退步緊？分分鐘係100呎住5個人。」

主打五星級的家「逼櫃園」，將珍藏的模型、玩具、錄音帶及yes卡等逐漸被消失、被遺忘的物品，放進一個又一個的櫃桶。黃偉研稱，現時不少樓盤標榜如無敵大海景、有會所、泳池等設施，「全部都係一式一樣，住咗入去係等於開心？其實每個人都應該有啲野係好珍貴，可能係細嗰玩嘅玩具，希望大家諗吓到底什麼是值得自己保存。」

項目策展人黃志明就稱，展覽「唔係真係帶大家睇樓」，希望可讓參觀者思考住屋與生活的關係，「有啲人買樓可能為咗保值，有啲人為咗買樓花了一生時間只為供樓。」他坦言，生活質素比擁有物業更重要，「買咗層樓唔代表開心，有地方住當然緊要，但地方大細、環境、係租定買未必令到一個人開心。有啲人住劏房生活環境係好逼，但都活得好開心，咁先係最重要。」

他又笑言，10年前購入將軍澳一個單位，「如果畀我再揀過，未必會選擇買樓，因為花咗好多精力同錢只係為咗一層樓，唔係好值得。如果攞啲錢擺喺其他地方，好像去旅行或者學吓嘢，得着可能比買一層樓多。」

「北角睇樓團」展覽即日起至今年7月17日，在北角「油街實現」舉行，免費入場。