梁永立食環署長大熱 - 李八方

蘋果日報 2002/08/06 00:00


衞生福利及食物局局長楊永強醫生,上任至今仍未埋晒班,手下重爭一位食物環境衞生署署長,暫時由副署長黎陳芷娟署任。八方側聞楊局長終於搵到心水人選做食環署署長,呢位就係政府物料供應處處長梁永立。
其實梁永立都算係楊醫生嘅舊馬仔,未調任物料處之前,佢係衞生福利局副局長,同任局長嘅楊醫生合作愉快。兩年前提交《人類生殖科技條例草案》時,連最難討好嘅立法會議員,都盛讚佢兩個準備充足。
梁永立處理危機事件亦有一手,話說早前物料處積壓「百年存貨」事件,都係梁處長親自上立法會解釋認錯,班議員相當滿意。預料就任食環署署長之後,第一件事就係會否以冰鮮雞取代活雞。冰鮮雞問題連特首在答問大會都被問到口啞啞,唔知梁永立有乜嘢高招?
﹙圖﹚梁永立處理危機有經驗,且看日後能否解決棘手的冰鮮雞問題。



傳真︰2623-9278
電郵︰[email protected]