貿易發展局主席吳光正噚日請傳媒食晏，推銷會展擴建計劃，八方就上咗一堂政治課，明白多咗《基本法》，又了解多咗去年四月人大就雙普選嘅睇法，更知道多咗吳主席嘅政治智慧。
吳光正話，民生、社會、經濟問題，香港自己可以搞掂，政制問題則必須聽命中央，唔可以自己話事，而中央嘅睇法，舊年喬曉陽講得好清楚，就係雙普選係目標，但達致目標要循序漸進，幾時漸進要睇實際情況。

教大家睇《基本法》

所謂實際情況有六個要求，包括《基本法》應有地位，行政主導落實嘅情況等等。咁即係點？即係中央將個波踢番畀特區，你問我幾時普選？我就問你實際情況發展成點。咁即係幾難有時間表。
教完大家學習喬曉陽精神，吳主席又教大家睇《基本法》。佢話八十年代寫《基本法》，最根本係想畀香港人一個安心，等佢哋唔使驚，而唔係畀佢哋一個希望，得到啲乜嘢。為咗令人人唔驚，所以就唔應該由某一階層控制晒，而係各階層各自表達自己訴求。八方終於明白吳光正點解主張長期保留功能組別。
佢之後再指點大家讀去年九月二十號十六大份報告。由○三年7.1遊行，到CEPA到自由行，到喬曉陽講話，之後又7.1，然後到呢份報告，變化已定；後來嘅馬交事件及今年三月特首辭職，預咗啦。八方睇番份報告，論及港澳有如下幾句：「保持香港、澳門長期繁榮穩定是黨在新形勢下治國理政面臨的嶄新課題……不斷開創一國兩制事業的新局面。」好三個「新」字。

與煲呔價值觀相近

問到吳光正點解支持煲呔，答案係「價值觀」相近喎，佢重強調○七年都會繼續支持煲呔，真係可圈可點。曾蔭權，好準備定應付一個強勁對手啦。至於捐錢支持煲呔競選喎，吳光正話只係捐咗約一百萬，唔係百二萬，亦唔係百三萬。點解捐？因為煲呔係公務員，冇理由要佢自己出錢競選，何況用剩啲錢係做善事。
呢個理由，真係可圈可點。

傳真︰2623-9278
電郵︰[email protected]