【本報訊】現時樓市強勢除了受全球「放水大遊戲」刺激，另一催化劑是本港在私樓需求上升之下，供應不升反跌。蔡金強斥特首林鄭月娥「非常之混吉」，「林鄭要攞出嚟批評，供地真係奇少無比；佢係接近玩嘢。佢唔只係私人樓嘅土地供應差，農地轉換都好差；對於香港人最實質的土地供應，佢真係零分或者負分」。

他指，沒有土地供應，談及私樓供應只是「巧婦難為無米炊」。現時供需平衡是來自梁振英時代的「遺產」，可能用到去2019、2020年，之後政府如何「拆彈」就不得而知。他料今年供應有約萬二套，「香港正常成交一年大約兩萬套，中間個gap（差距）搵耶穌去補咩？」

「無資格同樓市揼波鐘」

蔡金強預料今年樓價有逾10%升幅，「CCL跌咗10%，現在喺低位抽咗6%上嚟，以現在momentum（勢頭）去睇，點都可以破咗個4%」。他指，按「升兩年跌一年」的規律，樓市調整後「可升返衰退期一倍嘅時間」，即升至明年第一、二季。惟他料破頂後會橫行一段時間。問到現是否入市良機，他將買樓形容為強迫遊戲，「你無辦法獨善其身唔玩」，大家亦「無資格同佢（樓市）揼波鐘」。