第一上海（227）喺八年低位橫行，殘到不得了，抵博。第一上海啱啱公佈2012年半年度成績表，業績繼續見紅蝕3780萬銀，今年以嚟，中港股市唔掂檔，證券股冇運行。但要咁睇，第一上海今年6月底有現金3.7億銀，扣埋借貸，仲有淨現金1.8億銀，係現金牛。又集團NAV 1.8元，現價（0.52元）嘅折讓，高達70%，業績Turn around前，暫時有呢兩瓣因素墊底。再講，第一上海撥入流動資產嘅待售物業3.8億銀，呢期祖國整體內房銷售唔錯，嚟緊日子，內房業務只要一開波，應該支持到業績。第一上海現價已經貼到近金融海嘯及2003年沙士時水位，兜底擺中線，博一個開，上番1蚊樓上，未有耐上到NAV。

時富夠鑊氣短炒

時富金融（510）最新NAV 0.23元，現價（0.067元）嘅折讓，亦高達70%，又係另一家低殘證券股。又時富唔係好似上邊第一上海，有淨現金，但淨借貸只係3500萬銀，淨借貸比率3.8%，好安全。對上星期，時富股價未點郁，成交先嚟料，趁鑊氣成形，嚟轉短打博升20%到0.079元，亦係未有耐上到NAV。錢雋