甄子丹今日去到旺角一個商場，宣傳電影《星球大戰外傳：俠盜一號》，大會又安排咗幾十個基層學生同佢影合照，子丹仲有送聖誕禮物畀學生。

子丹話最近都係拍緊電影，但都攞咗兩個星期假幫《俠盜一號》做宣傳，之前就去咗洛衫磯打手印，再去倫敦出席首映，佢就話好開心：「因為我老婆都有嚟睇，迪士尼嘅老總嚟咗，一個華人演員嚟講，可以畀西方人欣賞。」

講到拍《俠盜一號》嘅時候，佢要戴住一個藍色隱形眼鏡，幾個鐘就要除一次，都好辛苦，不過子丹就話拍戲係咁，子丹嘅角色受到外國影評好高嘅評價，佢話：「你都知佢哋眼角好高，佢哋都覺得係一個亮點，好開心可以代表香港，有呢個成績都好開心。」

嚟緊新年聖誕都要開工，子丹話同太太仔女都係用facetime溝通，仲忙到睇唔到阿女嘅表演同錯過咗囝囝嘅生日，問到會唔會有人簽囡囡，佢就話：「呢啲唔講得住，遲啲先講。」