感光元件：500萬像素CCD（1/2.5"）
變焦：12×光學、4×數碼
顯示屏：1.8"
光圈：f/2.7-8.0（W）、f/3.5-8.0（T）
快門：15-1/3200秒
曝光補償：±2.0EV（1/3級遞增）
ISO：自動/50/100/200/400
記憶體：SD卡
檔案格式：JPEG、AVI
電源：AA電池×4　重量：405g
尺寸：113.0×78.0×78.5mm

佳能
查詢熱線：21702888

𠵱家D-SLR平價相機戰場，主要都係D70s同350D嘅角力賽，入場價$8,000開外，玩開數碼相機者覺得佢平，初升級者都會有牙痛感覺！下個月有一個變數，就是NikonD50推出，雖然機身規格不過不失，而且反應速度亦未算好快，但話明價格好平（但實質價錢未公布！）對唔係搵食機嘅拍友嚟講，真係好吸引！而Canon在本月底前推出S2IS，擺明競爭意味好濃！攞上手第一個感覺的確係一部好機，432mm加防手震功能，真係好多報館狗仔隊都未必有咁好設備，如果唔係少咗個熱靴同換鏡Mount，當佢搵食機都重得！

S2IS基本係年前推出S1IS的後繼機，最明顯升級是CCD像素由320萬像素，升級上500萬像素，而且CCD尺寸亦由1/2.7輕微加大上1/2.5，好處同菲林原理一樣，愈大吸光能力愈好；唔似其他機加像素、唔加大CCD咁冇誠意！不過更重要者，是影像處理器亦提升至與1DMKII、1DsMKII同級的DIGICII！感覺拍攝影像細緻又唔散，開機時間亦屬一般，1.4秒已經係唔錯嘅時間。更強是連拍功能，由上一代的320萬像素1.7fps連拍17張，提升至500萬像素2.4fps無限連拍（影爆卡為止）！記者測試時，感覺呢種連拍相有如跳格漫畫，真係幾過癮搞鬼。

講到戲肉，當大嗱嗱攞成$8,000幾買部350D都係跟支18-55mm（實際焦距29-88mm）標準鏡時，以半價買入S2IS竟然有支36至432mm、12倍光學變焦重炮揸手，感覺真係特別抵！432mm嘅威力，足夠數出到對面街位少女面上幾多粒暗瘡，更甚者是機身內置有4×數碼變焦能力，兩邊合計就有成1,728mm！
此外，為咗配合新手都可以攞得起呢支重炮，S2IS亦都算補品落足，首推是採用非球面鏡同UD超低色散鏡片，可以喺像素倍增之下，令顏色分明又唔散，此外鏡片組全由「超聲波馬達」驅動，由廣角變焦至遠攝只需1秒，反應迅速之餘，變焦時亦好靜，真係狗仔隊見到都要流口水！

玩開長焦距拍友都知道，長焦距相機為人詬病者，係有遠冇近！Canon今次對症下藥，加入了前所未見0mm超微距，只要有足夠光源，幾近都可以對焦，真正全方位覆蓋。
擁有咁長焦距，強力的「IS防手震系統」當然亦唔少得！基本的「常置」及「按下快門時啟動」的兩種模式，都有收入其中，不過最實用係佢加入了「移動鏡頭拍攝IS模式」，作用是可對拍攝主體作橫向追焦，而防手震系統就只會對垂直震動作補償，所以就算用嚟拍高速橫向移動物件（例如賽車），圖像亦可以十分清晰。
S2IS其他功能還包括有640×320（30fps）DVD級Movie，而且重係立體聲收音兼影爆卡；但S2IS並唔支援外接大型閃燈，只可外接專用閃燈；電源是最方便的4粒AA電，記憶卡轉行SD，對老機迷，可能又要掟多筆錢買卡。

S2IS係入門機新重炮，實際試用感覺唔錯，隔成條街唔落腳架，影像都係清晰靚仔，想知佢有幾強？去片！