區選曲終人散，唔少參選人近日都遞交選舉開支申報，其中喺九龍城又一村狙擊自由黨李梓敬、社民連「喇沙仔」周嘉發，選舉時都落重本，用咗成59,689蚊，比來自「富貴黨」李梓敬嘅37,992蚊仲多兩萬幾。但使得錢多未必係好事，因為周嘉發嘅開支中，原來有過千蚊「貢獻」食環署用嚟移除佢多幅未經許可嘅宣傳品。

今屆被工聯會小花陳穎欣擊敗嘅民協馮檢基，區選開支高達54,100元，比陳穎欣嘅40,574元多過萬蚊。而力保不失嘅經民聯梁美芬就用咗46,900蚊參選，一樣比對手游蕙禎BB嘅33,256元多過萬蚊，當中1,380蚊係用喺發出工聯會嘅400封推薦信。