廣告界老友行街鄭話：「咁嘞，不如叫財爺上埋電視，右手揸住半島靈芝，講一句『我係財爺，你唔係，財爺日日食半島靈芝！』一定收到宣傳效果！」
講笑咩，外國高官，凡來自商界嘅，就將一切投資交由一個blindtrust管理，不聞不問，點會間接為自己家族投資嘅產品賣廣告㗎？如果我係其他靈芝生產商，我可唔可以搵肥龍司長講「肥龍留港製靈芝」呢？財爺為人都幾公道嘅，佢應該立即與呢位甘輝泉經理保持距離，澄清佢與「財爺留港種靈芝」無關。
高官家族做生意，無可厚非，何況唐英年根本出身於大富之家。但啲手下應該體會領袖苦心，明知老闆已經做咗財爺，當然要知所避忌，𠵱家立法會議員時時要求「比白色更白」，郁吓就話調查是否有利益衝突，公司用「財爺」嚟打知名度，即係累親財爺名聲啫。