時間
97年10月23日

地點
亞視廣播道總台

人物
朱燕珍、韓君婷

經過
鬼妹仔韓君婷係歷年最好彩嘅亞姐冠軍，點解？咪因為佢本來係阿二，但因為佢選嗰屆嘅冠軍朱燕珍虛報資料，俾大會褫奪冠軍銜頭，結果由韓君婷冷手執個熱煎堆，無啦啦坐正囉！

開記招聲淚俱下

其實朱燕珍並非香港選美史首個被除名嘅冠軍，81年港姐冠軍羅佩芝，就曾經因為虛報年齡而被無綫除名，但羅佩芝係報細年紀，點都唔及朱燕珍隱瞞結過婚咁大鑊。
97年10月18日舉行嘅亞姐競選，朱燕珍摘冠、韓君婷獲亞軍，郭金奪季。點知朱燕珍做冠軍做咗短短五日，就俾人踢爆佢曾經結過婚。亞視查明真相之後，即發聲明指朱燕珍向大會隱瞞資料而取消佢嘅冠軍銜頭，改由亞軍韓君婷坐上冠軍寶座。
話口未完，朱燕珍又被傳曾經喺娛樂場所做過，結果同月24號，朱燕珍喺亞視總台舉行記招，聲淚俱下咁承認自己結過婚4年，又話自己只係做過知客，唔係做公關小姐。最令人估唔到嘅係，亞視呢頭褫奪佢亞姐銜頭，嗰頭簽佢做藝員力捧，可惜捧極都捧唔紅，最後人間蒸發。
本欄逢周一至周六刊出