當年今日
關於我們

【小學雞】《仁心解碼II》遭姦殺女 被嘲影衰香港人

蘋果日報 2013/08/09 06:00

仁心解碼II石天欣石破天欣affect晒你啲香港人Carefree

今年三月,喺無綫電視劇《仁心解碼II》開場冇耐,就被人強暴嘅無綫新人石天欣,劇都未上就擺咗張被姦殺再墮樓嘅「死相」上微博,令人怵目驚心,亦因為咁而人氣急升。

可能人紅咗容易招惹是非,前日「石破天欣」開開心心喺微博公佈話佢開咗個instagram戶口,歡迎大家add佢。點知,就出事了。事關有個叫ViVi嘅網民,係咁留言鬧爆石天欣,而且內容相當之無厘頭。

對話如下:

ViVi:你個樣好核凸
石天欣:我是核凸那又怎麼樣?你自己關注我這個核凸的人關我什麼事?
ViVi:你只不過係個Carefree(茄喱啡)演員,啲戲演得好核凸!affect晒我哋香港人。
石天欣:首先我向你道歉「affect晒你啲香港人」,不過我想請教你,如何才不會affect你啲香港人呢?
ViVi:扁嘴怪
石天欣:答案就是扁嘴就可以?

完完全全係無厘頭。呢位叫ViVi嘅疑似港女,仲好鍾意撻「英文」添,睇埋呢句:「讀中五果(嗰)時我就覺得你核凸喇,Flatchest(平胸),中華基督教會xxxx嘅校友!」咦,原來識0架?同學嚟0架?咁大仇口,唔通爭過仔?

呢場罵戰玩咗兩日,今日石天欣再於微博回應番ViVi,佢話:「原來這位認為我『affect晒你啲香港人』的留言者是我中學學校的校友,那你應該及時告訴我,及教我應如何補救。」佢仲將呢個微博post貼埋上instagram,成功博取網民同情。唉,大家都好「小學雞」囉。