【新增訪問】

跑馬有旺弱之分，好似年輕騎師祈普敦咁，第七場贏完姚本輝馬房「龍船鼓響」，到第八場一班1400米馬上贏埋大摩馬房「無敵飛龍」，個人首戰香港賀歲馬即奪賀年盃，同時包辦第七口孖寶。

「無敵飛龍」雷神棄騎換祈普敦亦順利連捷，呢場以次熱身份氣走大熱雷神揀騎之「世澤之星」，單Win及組合獨贏A1分別派29及14.5元，此駒兩駒亦造就全日首次有大熱Ｑ跑出，每注只派46元。

「無敵飛龍」馬主洪祖杭當旺，早前以名下超新星「佳龍駒」攻下香港經典一哩賽，今日開場前佢好有馬迷心，向入場人士派利是。結果「無敵飛龍」呢次即使雷神唔騎，依然威力十足，沿途守第五位，直路加速輕勝半馬位，可以捧盃連捷，洪祖杭今季累積三度拉頭馬，旺氣十足！而「無敵飛龍」在港累積7戰得3冠1亞2季，只落第一仗，實力深不可測。

大摩說：「『無敵飛龍』之前曾遇到一些阻滯而影響了進度，現時終能重回正軌，牠將會進軍各項分級賽，牠大概會是另一匹『壯思飛』，未必是最頂級的馬，但亦是一匹高班佳駟。」

反觀雷神騎番「世澤之星」搏殺失手，呢匹大熱門直路一度困守內欄冇位出，到望空後雖交出強勁衝刺，但卻為時已晚，追唔到走甩咗的「無敵飛龍」，被迫屈居亞軍，亦導致呢位前領騎師衛冕賀年盃失敗。

第八場三、四名由啡燈冷馬「快無極」及冷門「永旺年年」順序瓜分，四重彩派5,779元。