今屆區議會選舉，最受矚目戰場可算係黃大仙嘅龍上選區，因為九龍東票后陳婉嫻強勢復出，劍指明年嘅「超級區議員」。當大家金睛火眼實潛伏三年嘅嫻姐有乜嘢把炮，黃大仙嘅街坊突然見到「民主黨李華明」喺龍上選區出沒，一度以為龍上呢個選區將會上演「世紀大戰」，由兩位「師奶殺手」肥仔明大鬥嫻姐。

左派今次虛驚一場啦，實情係，佢哋眼花認錯人。原來迎戰嫻姐嘅係民主黨林偉基，同肥仔明倒模咁款，有八成相似。兩人同樣肥嘟嘟嘅四眼仔，令居民誤將肥基當肥明。八方有相為證㗎，相中嘅「肥仔基」同「肥仔明」同樣咁有份量，個樣老老實實，兩塊面額好有肉地，相信唔少年長嘅女街坊，一見到就想「搣落去」。
林偉基笑住同八方講，話日後可以同肥仔明以「孖寶兄弟」姿態一齊拉票，希望肥仔明喺選舉前捱吓義氣，「分身」幫幫手拉吓票。話晒肥仔基都叫做「打大佬」，嫺姐唔係容易應付嘅對手，而龍上呢個選區一向都係工聯會嘅陣地，過去都係由工聯會林文輝取得議席，所以要挑戰呢區，難度真係有十粒星。

不過，龍上區仲有人民力量候選人任亮憲，主力狙擊嫻姐之時都有可能令白鴿得票被分薄，林偉基大嘆「咁都冇符」，惟有盡力而為。龍上呢區由黃大仙上邨同幾棟下邨公屋組成，街坊聽唔聽得明維園阿哥講乜嘢都成問題喎。
冇加入龍上區大混戰嘅自由黨噚日喺九龍灣總部搞誓師，據聞佢哋本來諗住喺尖沙嘴嘅露天空地舉行，最後為咗慳皮移師室內，點知噚日竟然落大雨，田少同莎姐冇變落湯雞，黨友都還得神落，如果今明兩年選舉，都係咁好彩數就好啦。

mailto:[email protected]