當年今日

新春免費玩:潮拜IT新年 iPhone釣大魚

蘋果日報 2011/02/03 00:00


大年初一,先祝大家新年快樂,年年有「魚」!魚?要去邊度捉呀?其實商場入面已經大把,講緊係用iPhone當魚竿嘅《MTRMallsiPhoneApp》,結合商場贈送嘅「兔喜揚眉」利是封,你就可以用手機玩釣魚遊戲,一邊行Mall,一邊同隔籬班Friend鬥快捉魚,夠晒應節熱鬧!

記者:陳國輝
攝影:王文忠
Model:[email protected]
行場催運:男左女右
堪輿學家楊子東師傅,表示2011屬桃花年,當中對鼠(子)、馬(午)、兔(卯)及雞(酉)四個生肖影響最大!
咁點可以催旺桃花?楊師傅教路,鼠女應逛西面商場,例如荃灣或者西環;至於其他三個生肖,就建議分別去北區(上水、粉嶺)、西區以及南區(香港仔)嘅商場走一轉;至於想旺財嘅男性朋友,亦可根據子午卯酉各屬性,逛吓向南、西、西北以及東面嘅商場。
楊師傅仲特別提醒各個生肖讀者,當你第一步踏入商場門口時,男性應先從左腳踏入大門,女性則用右腳,亦一樣有旺財、旺桃花功效!
empty
楊子東師傅
利是封變3D魚缸
IT過新年,感覺絕對不凡!呢個所謂「兔喜揚眉」利是封,睇落紅彤彤貌似無乜特色,不過只要用iPhone鏡頭一掃,屏幕就立即出現一個充滿水墨畫風格嘅金魚缸。技術啲講,其實佢係用緊IT界流行嘅3D擴真實景技術,事前你部iPhone需先單撈《mtvmallsiPhoneApp》。但下下對住個利是封玩Game,又真係幾奇怪!所以遊戲另設淨Game版本,App內自助釣魚。
empty
■利是封上有跳躍中嘅兔仔圖案,十分應節。
empty
■食指控制魚竿釣魚,真係幾過癮!
最高境界吊龍吐珠
睇地鐵廣告,好多人都以為淨得金魚一款魚類,好寡口!點知玩落,發現佢只係第一關嘅角色;遊戲內仲有錦鯉、雞泡魚、獅子魚等,玩得叻,更有機會釣到最高難度嘅龍吐珠。查實每條魚仲代表咗一間商舖嘅Coupon,只要向商場換領處展示釣獲嘅戰利品,就可享受該消費優惠。此外,你更可將魚穫收藏到個人水族箱,隨時睇住佢哋游嚟游去,新正頭、年年有「餘」,好意頭啫!
empty
■咁多戰利品,睇見都好開心!
empty
■呢個就係個人水族箱,環境唔錯。
平台:iPhone
換購地點:德福廣場、青衣城
換購方法:消費滿$300或以上
TheOne玩叠箱箱
今年潮人必到新Mall,非尖嘴TheOne莫屬!商場提供免費《TheOneApp》等大家單撈,內容除最基本商舖指南及餐廳預約外,最勁係有埋MiniGames,玩法係iPhone近年好興嘅叠箱箱,明顯想大家步步高陛啦!
empty
朗豪坊送iCoupon
全港有Apps商場唔多,但最多人潮拜嘅MK朗豪坊,就提供咗《朗豪坊iPhoneApps》。睇樣雖然相當賣廣告,實情只需向商舖顯示你部iPhone,即可享受iCoupon內消費優惠。除一般折扣、食嘢大份啲,有時甚至係免費禮物。
empty
新港城電視求籤機
無iPhone點算?梗係有其他嘢玩啦!新正頭好多人鍾意到黃大仙求支好籤,之但係又怕逼爆兼俾濃煙焗暈?電子求籤機呢科嘢,睇怕就啱你玩!
新港城亦有IT大搞作,去到你會見到由9個屏幕組成嘅超級LCD,並以一粒按鍵取代傳統跪拜嘅方式,屏幕出現圖案後,你即可根據同一圖案拎籤文,內容簡單易明,連搵解籤佬都慳番!
empty
日期:1月22日至2月13日(逢星期六及日)
地點:馬鞍山新港城中心
日期:2月3至13日(逢星期六、日)
參加辦法:消費滿$200或以上(單一即日發票)
商場着數 又睇又拎
新年行Mall掃貨,當然要有着數啦!之但係邊一間商場有超筍贈品益大家,家就為你介紹吓!
崇光 財神派利是
唔理利是入面裝乜嘢,大家都係想攞番個彩啫!崇光百貨會分別於初一及初二,有財神喺商場正門大派利是,更有醒獅助興,場面一定好熱鬧!

時間:2月3日(1pm-3:30pm)
2月4日(3pm-5pm)
empty
新都會 勁送b.wing
潮仔潮女都鍾意b.wing,加上2011又係兔年,仲唔Hit爆!凡於新都會廣場以電子貨幣購物滿$400或以上,即獲贈b.wing利是封、記事簿、ToteBag或暖壺一個。

日期:2月3日至13日
empty
新城市 豪嘆白松露
沙田新城市廣場將對消費滿$15,000嘅星級消費者,贈送價值$700嘅「人間極品賀年禮品籃」,包括白松露醬及鵝肝醬,配以法國紅酒,豪爆!

日期:2月3日至6日
empty
海港城 甜蜜合拍
海港城雖然屬老牌商場,但節日活動不乏創意,今年於大堂設立XBOX360Kinect甜蜜合拍專區,並會使用Kinect遊戲《KinectAdventures》,測試你與另一半甜蜜合拍指數。

日期:2月5日前
empty
東廣場 懷舊平安展
新開張嘅觀塘東廣場將會舉辦首個懷舊平安鎖珍品展,有近百件獨一無二的珍藏品,藏品可追溯至宋朝的銀製平安鎖,相當珍貴,價值更係不菲,是難得一見的藝術珍品。

日期:3月6日前
empty
影靚裝 行桃花大運

九龍區
新世紀 扭耳兔
旺角新世紀廣場將一樓星際廳變成「Happy扭耳兔花園」,有超過20隻精靈可愛、身穿布製新春服飾嘅扭耳兔跑跑跳跳。必影位是高達7呎嘅桃花裝飾,寓意戀戀桃花、緣源不絕,旁邊仲有「鴻兔風車大道」迎接新一年。
empty
■新世紀廣場有條「鴻兔風車大道」,影相靚似桃花時光隧道。
empty
■「Happy扭耳兔花園」人人爭影!
德福廣場 新派花展
德福廣場設立咗個「褔兔躍動花藝林」立體花藝展覽,展覽中動用超過8,000朵中國傳統年花,以西式及和式花藝風格重新包裝;並提醒各位已凋謝的花卉植物亦可製成藝術品,將時間大大延長,係一個另類花巿,必影!
empty
黃埔新天地 18呎Miffy兔
黃埔新天地會有個Miffy兔新春佈置,當中最震撼係在戶外擺放咗一隻18呎、全球最巨Miffy兔,守候於「黃埔號」外同大家拜年,雖然佢大隻咗啲,但仍然可愛,好想同佢合照呢!
empty
朗豪坊 密密掘金
朗豪坊會以「錦衣兔」及「金蘿蔔」作為新年佈置主題!在朗豪坊四樓的「金蘿蔔庭園」中,會見到巨型金蘿蔔,吸引五隻活潑錦衣兔齊齊出動掘金,快來同佢哋影相沾吓財氣。
empty
K11 竹願園景
K11以竹為題,使用188枝金箔真竹配喜鵲,重新演繹牛郎織女於喜鵲橋相會嘅浪漫。喜歡合照嘅話,仲有個3.5米高的「喜鵲情籠」俾你玩,情到濃時仲可以喺許願木牌寫上情深說話!
empty
香港區
國金 風箏展翼
IFC放咗一條長達100呎、全港商場最長嘅龍風箏!場內另展出40件巨型風箏,據講用咗四個星期,全人手繪畫、製造,加上地面展出近百隻晶瑩典雅嘅琉璃金兔,好似身處桃花林一樣,啱晒影相留念。
empty
太古城中心 財源滾滾來
太古城中心庭園中央設咗兩座滿載年花及金珠串嘅巨型紅色水車,寓意花開富貴、貨如輪轉;商場地下仲有個「心想事成」水車,行近會聽見水聲潺潺,運轉不停,去影相自然可以沾啲財氣、財源滾滾。
empty
時代廣場 財神桃花燈
時代廣場有棵10米高巨型財神桃花燈,燈罩上共裝置了1,088朵五光十色桃花,還有金黃色的蝴蝶於花間飛舞,好兆頭又搶眼。另外仲可以到電子版財神殿求福㖭!
empty
新界區
新都會 潮語猜燈謎
新都會廣場特選咗極好意頭嘅8,888朵賀年年花,配上身穿節慶服裝嘅可愛娃娃,同大家拜年。場內另設101潮語燈謎陣,喺電視屏幕中同大家玩猜燈謎。
empty
新城市 精雕花瓶
沙田新城市廣場一期三樓,放置咗一個個紅彤彤的通透精雕花瓶,上面嘅珠簾閃爍,有如銀柳一樣垂落,配上盛開嘅桃花,特別吸引鏡頭。想來年桃花緣旺,必影!
empty