今日王君馨早前同拍拖11年嘅圈外男友Daniel喺香港美國會搞婚禮，去到6點半一對新人進行切蛋糕儀式，儀式喺戶外進行，首先由三位兄弟團同一眾姊妹團蹺住手出場，之後到一對新人一同步出，佢哋首先喺台上大合照，之後就剩下Grace同老公合照，佢哋仲不時深情互望。

喺台上Grace仲分享今日婚禮嘅感想：「好開心、好滿足，冇諗過婚禮咁感動，一聽到首歌嗰陣已經感動到喊，老公完全唔知我會唱歌佢聽，佢仲問我揸住枝咪做咩，今次成功畀到surprise老公，呢首歌代表我對佢嘅愛。」至於老公有冇畀驚喜你？Grace笑言：「佢今晚就會畀驚喜o架喇！」

喺訪問時，問到Grace嘅心情，佢話：「好緊張，未入場覺得有少少混亂，不過我見到佢就好開心，最感動就係讀返我哋自己寫嘅誓言，我嘅誓言就係無論第時遇到更靚仔、更適合嘅人，我都會揀佢，而佢嘅誓言就係話想一齊生活，了解我更多。」之後Grace仲大讚老公今日講咗好多嘢，而佢平時係一個好靜嘅人。