香港人有殖民地情結，睇波都鍾意追捧英國波，四年一度世界盃港人集體回憶英治時代美好時光，幾乎人人都捧英格蘭。英國國家隊勝負牽動前殖民地子民情緒，前晚英格蘭驚險出線，好多香港球迷鬆一口氣。白鴿黨高達係英格蘭擁躉，噚日坦言對英格蘭贏波感到好興奮。高達指英格蘭雖然贏得驚險，不過表現好過之前兩場，佢話為慶祝，下次開會時會着英格蘭波衫出場，唔好嘥咗呢件花幾百蚊買嘅波衫。
前晚散會後，白鴿黨主席何俊仁由幾個兄弟陪伴離開，卻見唔到李華明。佢噚日同八方講，由於實在太緊張英格蘭對斯洛文尼亞，所以散會後第一時間離開立法會趕返屋企，好彩走得快，睇到大半場，慶幸英格蘭出線，今屆世界盃仍然有興趣睇，否則就冇癮嘞。
宣佈退出民主黨嘅鄭家富，同其他前黨友一樣都係捧英格蘭，阿富稱會後回家睇波，見到英格蘭贏一球，即時放下心頭大石，心情舒暢番，「好彩英格蘭贏波，都冇咁唔開心」。社民連主席陶君行向來捧英國波，因此雖然已經退出民主黨多時，同民主黨政見水火不容，但講到睇波依然有偈傾，話晒大家捧埋同一隊波，一team人可以被北京分化，但要離間佢哋唔捧英格蘭睇怕冇咁易。