黃浩然同黃翠如「雙黃」嘅新劇《師父，明白了》，雖然有無綫寄予厚望——一來因為翠如BB得寵，二來都係因為翠如BB喺呢個劇表現唔錯，可惜仍被看淡。

有觀眾睇咗第一集，已經猛話唔明，仲聞到陣cult味。「靚女」、「肥嘢」呢類港式對白都叫見怪不怪，一開頭有兩隻蝴蝶飛下飛下，但唔知係咪電腦動畫做得未夠好，兩集蝴蝶喺牆上面冇影0㗎，真極有限囉，仲令人諗起劉華套電影《大隻佬》添。

另外，劇中有四位女演員嘅服飾，特別係佢哋嘅腰袋，真係可以落旺角都買到，明朝就有？係咪回到未來呀？

至於間衙門又整到好似警署咁，黃浩然除咗要「報到」之外，仲一嚟到就問：「我個位呢？」只係係差在冇講到「點解我部電腦咁慢0架？」一大班人又企晒喺度講是非，又拉隊話同浩然去食「開工飯」，咁得意？

呢間警署真係好modern，裡面有塊類似白板嘅坐地木板，可以開會討論點樣捉賊，人人仲自己有張枱，個格局同另一cult劇《神探高倫布》個60年代警署有得揮。

講完啲景，就講人喇，黃翠如一貫甜笑上陣演出，至於上次做《老表，你好嘢!》時演「凸眼MonicaD」嘅許亦妮，今次飾演捕快，對眼雖然冇咁凸，但都瞪得好大，就連用劍對打時，對眼都瞪得好大，因為個表情根本冇乜變過...

不過最勁嘅都係嗰位婆婆----黃浩然叫佢幫手翻譯嗰位婆婆呀，佢完全係一位專業級即時傳譯員，可以非常流利咁將打劫銀行嗰位人兄講嘅普通話，即使翻譯成廣東話，仲勁到位人兄都未講，婆婆已經譯咗出嚟，勁！

師父，實在太cult了！

P.S.不過，亦都係靠《星夢傳奇》，令大家多咗留意其他配角，例如鄭俊弘同羅鈞滿，出鏡雖少，但印象深刻。