【韓流】李秉憲做愛妻號 探班兼送餐車冧老婆李敏貞
李敏貞李秉憲
現年35歲嘅韓國女星李敏貞於2013年同48歲男星李秉憲結婚,兩人喺2015年升呢做父母,李敏貞平安誕下囝囝。
李敏貞近日忙於拍攝SBS新劇《命運與憤怒》,身為老公嘅李秉憲就好貼心,仲親自探老婆班。李敏貞受訪時透露因為今日所有演員都有份出演,而咁啱拍攝現場就喺江南,同佢哋屋企好近,所以李秉憲就即做廿四孝老公,親到現場探老婆班兼送上餐車,為劇組及一眾演員及工作人員打氣。
事實上,李秉憲一向都好支持老婆,兩年前李敏貞拍攝《回來吧大叔》時,李秉憲亦都有送餐車為老婆及劇組打氣。現時李秉憲正忙於拍攝新片《南山的部長們》,但比起李敏貞要日夜趕拍劇集,李秉憲時間上就比較鬆動啲,所以即抽空探老婆班。而之前李敏貞上綜藝節目《我家的熊孩子》時,曾經講過如果《命運與憤怒》收視破15%嘅話,咁李秉憲就會出演同一個節目《我家的熊孩子》,不過現時《命運與憤怒》收視仍未能破雙位數,睇嚟觀眾想見李秉憲現身節目仲要等多一排。
精選韓流,喺晒《娛果》
http://fb.com/appledailyent