摩根士丹利前策略師、現任私募基金黑石集團顧問服務部阿頭韋恩，佢一年一度公佈嘅「十大驚奇」又嚟嘞！當人人都話今年最大嘅危機，係歐豬國家需要巨額再融資，擔心信貸緊縮會令歐債風暴捲土重來之際，韋恩大師就話歐豬危機冇有怕，你話驚唔驚？不過，原來舊年韋恩嘅「十大驚奇」竟然冇個中，呢個先至係真正嘅驚奇。

「歐債危機唔再係大問題」

舊年歐債危機爆發，希臘同愛爾蘭都已經先後求救，韋恩話其他歐豬國家亦都承諾削赤，所以一旦再有國家出事，只要佢哋聽聽話話履行減低赤字嘅承諾，歐盟同國際貨幣基金組織（IMF）都唔會話由得佢死嘅，所以歐債危機唔再係大問題。
之但係，佢又話歐盟提出嘅拯救方案治標唔治本，長遠嚟講問題仍然係「未解決」。看官可能會話「唓，咁又話冇有怕？」哈哈，呢一題華華相信可以代韋恩答，「話明呢個係2011年十大驚奇，成年嘅嘢，梗係留番一年後先驚啦！」
今年70有6嘅韋恩，已經係連續第26年公佈「十大驚奇」。不過，可能佢年事已高，舊年嘅「十大驚奇」竟然冇個中！有網民對韋恩今年嘅預測眼尾都唔睄吓，話佢預測冇個中，要去到咁爛係一件超難嘅事喎！網民不留情面繼續插，又話韋恩係「燈神」，叫投資者同佢對賭就有運行嘞！
不過，韋恩測市都曾經輝煌過，佢曾經準確預測2001年科網泡沫爆，2009年亦都估中股市、金價同油價會狂升。

韋恩2011年十大驚奇

１）美國經濟增長高達5%，失業率跌到9%以下
２）美國負債加劇，10年期國債嘅債息將升到5厘水平
３）標普500指數升上1500點，但係下半年會隨住加息而出現調整
４）現貨金價會升上每盎斯1600美元嘅歷史新高
５）中國繼續操控人民幣滙率，令經濟增長維持喺10%以下
６）農產品價格繼續飆升
７）美國樓市情況持續改善，新屋動工今年會逾60萬間
８）供求失衡令油價升上每桶115美元
９）美軍喺巴基斯坦同伊拉克作戰了無寸進，奧巴馬會加速撤兵，受恐襲嘅風險增加
１０）歐盟同IMF會向財困國家貸款，歐洲債務問題唔會演變成大問題

李華華
mailto:[email protected]