一宗爭產案，令全城知道，喺立法會公聽會爆粗而成名嘅民建聯大律師馬恩國，老竇係名畫家馬家寶，徒弟包括前律政司司長梁愛詩等城中名人。

雖然俗語話：有其父必有其子，但馬恩國似乎冇乜遺傳到父親嘅畫畫基因，自稱由細到大對畫畫都冇乜興趣，反而係書蟲一名。佢同八方講，年幼時每逢周末或日，一家人都成日郊遊，老竇主要係去寫生，但佢唔會陪住畫，反而會喺媽媽身邊睇書消磨時間。佢話自己對文史書籍最感興趣，中國名著《西遊記》、《水滸傳》及《三國演義》都係心水，唯獨《紅樓夢》卻看不下去，「一啲英雄氣概都冇，情情塌塌『太粉紅』嘞。」

原來佢曾經買過一本《龍虎門》返屋企，結果卻被雙親狠狠撕爛；除咗讀書，佢話細個都鍾意集郵（佢強調，真係收集郵票嗰隻喎！），會透過郵票認識唔同國家。

咪睇馬恩國宜家咁大大隻，睇返佢五、六歲時嘅舊照，其實佢細個時都唔算係肥仔喎。當時嘅佢影相一大特點或者係：好鍾意嗡起眼耳口鼻扮鬼臉。原來細細個嘅佢，已經開始整蠱造怪咯！