中國自動化（569）食住阿爺喺鐵路同油氣管設備投資加碼兼加速，注定係肥過肥仔水，但現價（1.56元）仲係喺五年低位浮沉，預測PE得8倍，平咗80%，勁抵搞。
中自化係祖國最大嘅石化行業安全緊急控制系統、鐵路訊號糸統，同控制閥方案供應商。又啱啱喺上星期，中自化先公佈，同大孖沙中石油管道分公司合作開發國產化輸油管線調壓閥，喺多重測試後，順利獲通過驗收。阿爺「十三五」規劃，管道鋪設要倍增到30萬公里，中自化預期，油氣管道快速發展，對管線調壓閥需求，係以數十倍增幅計。上邊睇到，中自化無論係規模或技術，都係no.1，爭取定單，肯定跑贏。

未來增長夠火爆

再睇鐵路嘅瓣數，若按照「十二五」規劃12萬公里長度，祖國今明兩年，仲要完成多1.7萬公里（投資等值1.4萬億銀人仔）先達標。又阿爺透過鐵路外交，實行高鐵走出去政策，包括開通中俄、中亞同中泛亞三條線，海內外鐵路瓣數，係長撈長有。
中自化今年半年純利，只係增長4%，到6,830萬銀人仔咁大把。但要咁睇，尤其係中自化主打瓣數，集中喺建設後期，即係話，喺嚟緊嘅日子，先至係中自化增長火爆期。場內專業評估，中自化今、明年度EPS 0.163元同0.194元，明年PE，由家陣18倍，大跌到得番8倍。在祖國嘅行家輝煌科技，家陣76倍PE，今年預測PE仍然去到41倍；又中國城市軌道（1522）一年大升咗近2倍，上星期創埋新高，家陣5倍PB，中自化仲係得0.7倍，又係平咗一大截。
買中自化，睇佢翻半番，上到2.35元，PB先啱1倍多啲，明年預測PE得12倍，未有耐追到兩位行家。

錢雋
細價股專家
本欄逢周二、三、五刊出