東廐「振興中華」同「聰明波」今午轉倉初出，做足工夫出擊，可惜所托非人，蔡明紹先後搏輸屈居亞軍，另一東廐馬「喜蓮芳芬」亦配蔡明紹跑第二，告仔師徒完全冇晒火，蔡明紹仲有沈廐「比你高」及鄭廐「神童」僅敗，全日五場屈居亞軍，邊有騎師咁黑㗎！
「振興中華」及「聰明波」今日同作轉東廐後首戰，可惜兩場撞正雷神發威，統統冇運行，力拼下皆以短距離見負，呢個賽果證明唔係告仔鬥志唔好，只係徒弟手風唔順，加上「聰明波」四檔出閘，走大外叠蝕位追唔切，老襯到暈，搞到東廐全日咁嘅牌面居然一W都冇，累死捧場客。其實尾場蔡明紹原本可以打番場爭氣波，只不過黑開有條路，唔夠高伯新旺，「喜蓮芳芬」追唔到高廐「飛哥」。開季以來蔡明紹攞到18次亞軍，頭馬則只有12場，遠遜上季同期。