獲封雷神，莫雷拉呢日向馬迷展示神級功架。結果佢喺尾場三班1400米贏大熱門賀廐「超凡夢想」埋齋，全日合計出足十場獨取五W四P一殿，個人首次在港一日五捷，五場頭馬分別是「紫電明珠」、「笑眼光」、「人強馬勁」、「天笑」及「超凡夢想」，仲以82分之高擸埋騎師王，頭馬一下子彈上36場，拋離潘頓增至9W。
「超凡夢想」上仗不敵容廐「觀自在」大熱倒灶跑第二，今次再戰千四米，依然係大熱門，結果人馬同時向容天鵬報仇雪恨，「超凡夢想」後上輕取容廐「一馬當先」補中，打開馬兒今季勝利之門。今場第三、四名分別係「伽楠」同「美麗里程」，四重彩派七千幾蚊。
馬主蘇凱欣今季有「同個夢想」兩捷及「超凡夢想」一WIN，其父親蘇啟聲說，很開心馬兒終於交出水準，收復失地。練馬師賀賢指「超凡夢想」上場表現已很好，無奈遇上更強的「觀自在」，今仗發揮出應有水準，加上對手没有上場般強，可以說這場頭馬是牠應得。