當年今日

哭過痛過
趙薇受創心靈等愛呵護

蘋果日報 2002/01/27 00:00


趙薇從北京電影學院畢業後,事業可謂一帆風順,一齣電視劇《還珠格格》令她紅遍東南亞。可惜早前趙薇因穿着日本軍旗服拍照,掀起軒然風波,上月底在湖南表演時更被淋糞,令向來性格樂天的趙薇身心俱損,更為此而哭過,並渴望早日覓得愛郎呵護受創的心靈。
遇襲後始知人緣佳
趙薇早前因為穿着日本軍旗服拍照,引來無妄之災,上月底在湖南表演時,慘遭一名內地男子衝上台扼頸及淋糞,整個遇襲過程被圖文並茂地廣泛報道。
日前趙薇抵港為電影《天下無雙》宣傳,她在銅鑼灣邀月茶館回憶起此事時,心境平和地說:「一切已事過境遷,好彩發生事嗰陣,我重拍緊王家衞公司部戲,所以我可以喺上海安靜咁拍戲,避開晒啲傳媒。

放長假遊歐洲
「後來王家衞佢哋又幫我搞咗個發布會,大家都公開講嘢支持我,我好感謝呢組戲嘅台前幕後人員,好似劉鎮偉、王家衞、偉仔同王菲,佢哋私底下都有安慰我。而內地有啲大明星平日同我好少聯絡,但發生咗呢件事之後,佢哋都打電話嚟開解我,以前都唔知道自己人緣原來咁好。」
遭遇如此難堪事,趙薇卻堅強地熬過去。稍後趙薇計劃放一個月長假期,到英國拍廣告,並順道暢遊歐洲。

眼下生有淚癦
看着眼前趙薇表情生動、樂觀的笑臉,忍不住問她可有為遇襲一事而哭過,趙薇說:「為咗嗰件事,我都有喊過,你睇我眼下面有一粒淚癦,有淚癦嘅人,係好易喊㗎!千祈唔好以為我好堅強,其實我都有脆弱嘅時候,不過最近知道咁多人錫自己,又經歷咗咁大件事,我都變得更加珍惜自己。畢竟人生經歷咗挫折,就會成長起嚟。」
拒聘保鑣護身
趙薇現在依然如常生活,從未想過要請貼身保鑣,她說:「我喜歡自由自在咁生活,唔鍾意出入有成班人跟住我,上次遇襲嘅事,係好個別嘅事件,所以我並唔怕一個人去逛街,對個人嘅人身安全亦唔擔心。至於再上台表演有冇恐懼,呢個問題,我都答唔到你,因為嗰件事後,我都未有再上台表演過。」