正忙於籌備舞台劇嘅黃秋生，忽然驚爆有位已經20歲嘅私生子，而秋生自己亦承認。至於呢位20歲私生子，原來一直同阿媽喺英國生活。至於秋生同老婆所生嘅大仔黃睿銘，早排秋生就飛咗去美國，參加大仔嘅畢業禮，秋生仲好欣慰咁話︰「終於等到呢一日。」

今年56歲嘅黃秋生同老婆吳惠貞相識時，佢都未成名，兩人於1992年結婚，並育有兩子，長子黃睿銘同次子黃煜政。不過佢同老婆長期分開居住，秋生曾經講過話佢同老婆一齊住，沒有自由空間。唔想有束縛嘅秋生，唔想同老婆成日嘈交，所以各自分開住，多年來兩個仔跟隨媽咪生活，不過秋生對三母子一直照顧得好好，間中傳媒仲影到秋生同老婆拖手去街，好溫馨。

多年來，秋生女人緣特別旺，緋聞更沒完沒了，先後同佢傳過緋聞嘅女星，中港台靚女都有。好似2007年同范冰冰拍電影《寄生人》時，有傳扮演情侶嘅二人戲假情真，同年秋生拍西片《盜墓迷城3》時，有指佢同台灣名模孟廣美傳緋聞，至於2009年秋生拍電影《Laughing Gor之變節》時，戲中同秋生跟出跟入嘅呂慧儀，被指喺片場幫秋生剪指甲。雖然多年來秋生有咁多緋聞，不過佢同老婆感情沒變。

精選娛聞，喺晒《娛果》
http://fb.com/appledailyent