曾於90年代叱咤一時，一手捧紅鄭秀文及黎明的金牌經理人李進，提到香港樂壇青黃不接，他嘆謂：「呢個問題出現好耐，因為成個生態都改變緊，當資訊世界咁爆炸，數碼世界咁深入民心，好多嘢都改變，隨住生活方法改變，情緒同需求都會跟住改變！」

李進續謂：「80年代、90年代，音樂表演事業逢勃係好多嘢形成，現階段唔係靠賣CD，成個生態鏈都唔同咗，改變咗。藝人要把握到音樂消費者嘅要求，點解要鍾意你，要掌握到啲歌點樣可以產生共鳴。」

李進又指，發行部份都有問題，佢認為投資、發行及經理人公司的利益分配都要改變。他說：「投資方要攞到應有回報，如果成日蝕錢，邊個會投資？」不過，李進唔認為北上是惟一出路，又以歌手Susan Wong（黃翠珊）為例，指她的歌經常出現在歐洲網上電台。他說：「歌手定位好緊要，唔一定要北上，內地係有13億市場，但內地歌手都未必打得開呢個市場，歌曲水準最緊要。」