巴塞隆拿對曼聯唔係新鮮戲碼，但巴塞對哈德斯菲爾德又有冇可能發生？唔使等歐洲賽，可能有機會喺英超出現。

西班牙加泰隆尼亞會喺周末進行獨立公投，未來係點冇人知，一旦加泰隆尼亞獨立，本來屬於西甲嘅豪門球會巴塞隆拿又何去何從？當地體育大臣話，去邊都得，去英超踢都冇問題。

體育大臣費卡洛斯話：「如果獨立成事，咁加泰隆尼亞地區嘅球隊就可以自由選擇去邊度踢聯賽，可能留喺西甲，亦有可能去附近嘅聯賽，例如意甲、法甲或者英超。咁做喺政策上係完全可行，現時喺西班牙都有嚟自國外嘅球會，安道爾有足球同籃球隊參加西班牙聯賽，摩納哥踢法甲亦係例子之一，我認為歐洲足協唔會干涉球隊跨國參賽。」