唔係搞gag呀，杜汶澤就係因為有政治人物嘅一番言論，搞到佢火都嚟埋！

行會成員鄭耀棠今日就香港普選特首「筲箕論」表示支持，仲發表咗「偉論」，佢以「筲箕淘金可篩選出好東西」作比喻，仲講咗一句： 「好似西方普選咁，整咗啲艷星出嚟，咁係咪我哋想見到嘅呢？」

嗱，艷星出嚟選特首會唔會得到人支持就唔知，不過呢番言論就令杜汶澤好大反應，佢將新聞中嘅訪問cap圖，再upload上facebook，話： 「鄭耀棠話如果普選無篩選，就會好似西方選舉咁，有艷星當選。『艷星』有乜問題？都好過你，只係一粒『XX星』！」

呢個post有接近三千個like，仲有二百人share，睇嚟網民都好buy阿澤。之後阿澤又share咗另一個post，原來係一條問題 「通識題：試舉出三個有可能參選香港特首的艷星。」 不過阿澤就加多句： 「全力支持周秀娜選特首！」

嗱嗱嗱，就算係娜姐真係要出嚟選，只要有好嘅政綱、好嘅視野，市民又buy嘅話，點解唔可以選先？咁先係貫徹真正嘅民主0架嘛！

不過又話時話，娜姐最多咪性感女星，幾時變咗艷星呀？真係艷星，不如搵雷神啦，喺《3D肉蒲團》極速兩秒露點嘅雷神雷凱欣呀！