今季華將在谷草已贏得14場頭馬，佔谷草頭馬總數約三分一，當中在9月13日夜賽採用B跑道，華將更捧走其中六W。

明晚（11日）谷草賽事再次在B跑道進行，不妨吼實華將的座騎，其中第四場「金如意」及第六場「開心旅程」分別配楊明綸及黃皓楠，憑輕磅之利皆有勝望。

第六場三班1650米：今場有七駒配華將，預期前中段步速會快，形勢有利後上馬爭勝。「開心旅程」在港贏過三場，在不同場地及路程取得，而且贏親都有分頭。

上季採用留前鬥後跑法之後，成績有所突破，大前仗贏田草1400米，能夠擊敗同程好手「神威敖翔」及「世界紀錄」，表現相當出色。

上仗跑泥地短途，前段完全跟唔住，但直路追勢強勁，現階段較啱跑中距離，今仗增程跑一哩，而棄爭本周六（14日）的泥地短途，部署有的放矢，用華將亦要重視。

「中華之光」近兩仗分別負於「五十五十」及「閃耀鑽皇」，賽事水準極高，今次轉爭谷草，級數高過對手一大截，有權一網打盡。

「情趣」今年元旦日轉五歲後已經贏咗兩場，五歲愛爾蘭馬大熟，需要跟進。「明月光」上場跑1200米嫌短，亦只輸兩馬位跑第四，增程更啱跑，可爭入圍。