經濟麻麻，但新年到市民辦年貨無手軟，除傳統曲奇朱古力，追求健康的港人近期熱捧生果，近日油麻地果欄一帶人頭湧湧，私家車泊滿街，市民爭相選購心儀生果，主打近期熱選的塔斯曼尼亞車厘子，日本蘋果，宮崎蜜瓜，亦有人鐘情傳統鮮橙，柑桔，日本蘋果。

記者：金敏琍攝影：周子惇

不過有市民預算千元買生果，不講價即付錢，「大約會使一千蚊買生果，過年過節都唔會慳得嗰一千幾百，平時喺其他地方慳返咪得囉。」亦有人直言「無上限」，「呢啲係必需品，邊樣生果靚就買邊樣。」

油麻地果欄的和興欄老闆李生稱，果籃已經過時，越來越多人來果欄買生果，「有啲人送禮，常常一箱箱，甚至廿幾三十箱、三，四十箱咁攞返去慢慢分批送。」他續稱，買一箱生果較到生果店砌果籃化算及環保，更重要是日本出口的生果，果盒外形美觀，送禮自奉皆可。

過年送禮最緊要大方得體，日本生果成主流，當中以蘋果、士多啤梨、車厘子及蜜瓜最熱賣，到底怎樣揀靚貨？進濤果欄的聰仔教路﹕

世界一蘋果
「來自青森縣的世界一蘋果產量極少，以深色為上品，聞落去有少少香味，太香即係太熟，反而唔好，小小香就可以。」

福崗甜王士多啤梨
「選擇士多啤梨有技巧，攞出來睇吓個盒底有無水印，有水印即代表士多啤梨太熟，或者有爛或撞傷，個盒底會有紅色一點點。」

塔斯曼厘亞車厘子
「呢款係今年最熱賣嘅車厘子，同樣要拎個袋出來望望袋底有無濕，有無車厘子汁喺度，正常係無，好乾爽，摸落去好實淨，咁就係最靚車厘子，雖然越深色越甜，但應買淺色，因為可以存放耐啲，慢慢食。」

宮崎蜜瓜
「呢啲瓜一棵樹得幾粒，營養價值好高，首先要睇個掟，要有啲收水，俗語講叫『上咗糖』，即係啲糖份已經入咗裏面。」

想睇最新消息？　即時follow【現場－蘋果突發】 fb！ http://fb.com/applecitycrime