由今個禮拜三開始，今季餘下三次夜賽都在沙田舉行，今次就編六泥兩草，有三場泥地1200及三場泥地1650米，兩項路程不論檔位形勢及跑法上均有頗大分別。夜泥1200米一檔係死位，近三季42場都未贏過，中檔表現最好，六檔及八檔分別是勝出及上名率最高檔位。夜泥一哩剛好相反，由於出閘不久就轉彎，一檔上名率接近四成最高，反而12及14檔近三季都未贏過。跑法上短途利前置，以最近3月26日為例，五場夜泥1200米頭馬，全部守前五位入直路建功，其中「雄心勁龍」更加一放到底，一哩就利追唔利放，當晚兩場同程分別由「威悅」及「經典皇牌」後上取勝。
今戰列陣馬中，第四場「歡欣星」三戰夜泥1200米不勝有位，抽得勝出率最高之六檔可秤先。另外，尾場「競技英雄」跑泥地一哩四次半數上名，抽到黃金一檔可食尾糊。
至於兩場草地為B加2欄跑1200米，剛周日同一移欄賽事，已見內叠前置馬連場上名，好似「永神駒」、「金碧陽光」及「喜蓮標緻」放頭帶到，加上夜賽受燈光影響，預期前置馬會更有利，第三場「野孩子」及第六場「勁酒王」可擺前走，值得優先留意。