富豪唔怕夫妻間有「感情缺失」，搞吓「課外活動」好平常。有經驗嘅新地非執董郭炳湘（大K），噚日到香港大學出席佢捐助嘅獎學金活動時，被問到婚外情對特首選情有冇影響，可能唔想亂講「課外活動」教壞學生，縱橫江湖多年嘅大K講到呢個問題時，竟然面都紅晒，話唔一定有影響嘅：「主要睇佢嘅政綱、團隊、個人領袖能力，以往政壇上，都證明到，私生活還私生活，工作還工作。」

正所謂人不風流枉少年，八方相信大K對呢句話體會甚深，事關佢感情生活都好豐富，與首任妻子顧芝蓉82年喺美國史丹福大學成婚，半年後就離婚，之後情迷李天穎，有個女。不過佢後來投入「課外活動」，08年情人節後，大K忽然「被放假」，據說與紅顏知己唐錦馨被指想入新地有關，結果觸發郭家風暴，後來確定分家先暫時平息。
自立門戶後，大K以個人名義成立慈善基金，最近同港大、牛津合作，噚日去港大主持「HKU/OXFORDKWOKSCHOLARSHIPS」啟動禮。呢個獎學金初步計劃明年9月起捐100萬元左右，資助兩名港大學生到英國牛津大學新開辦布拉瓦尼克政治學院讀一年碩士，每人約有50萬港元，包一年學費連生活費，至於基金總金額未定。

牛津呢間新學院想挑戰哈佛大學甘迺迪政府學院，目標係培育具國際視野嘅政治人才，據講末代港督、牛津校監彭定康都係講師之一，港大叻仔叻女有機會攞獎學金跟肥彭學嘢，可能比自稱「政治家」嗰位特首更有前途。
肥彭近日來港推廣牛津新出嘅幼兒英語教材OxfordPath，向港爸港媽介紹教港孩學英文心得，呢位校監由BB班到碩士班一網打盡，瞓身幫牛津省招牌，賣力過「孤獨的推銷員」。
mailto:[email protected]