上星期，香港創科圈最大單新聞，唔使講，一定係Ztore。

Ztore早期賣的是本土形象，有不少港產特色產品，公司有三位創辦人。佢地對手，最初有本地早晨，同新加坡HonestBee。但融資後，公司更具規模，HonestBee又停止營運，目前主要對手，剩返HKTVmall。

今次出事位創辦人，本身有家底，又有內地人脈，明顯係一位money guy，主要負責融資。但我想講，由於香港創業成本極高，創辦人本身有雄厚資本，根本就是常態，唔係咩出奇事。

舉實例，我最近搞了個追蹤香港創科生態圈嘅每周簡報，入面有個懶人包，列咗15家經常投資香港初創嘅VC，我盤點一下，以紅色資本為主，就佔了三分之一，唔多但亦唔算少。點解？因要做大估值，中國市場係必然要講既story。

其實，有紅色資本又好，要入中國市場都好，公司同創辦人既形象，理論上唔需要一致，而且至少有兩條路走。

第一條路，係委任兩條完全獨立嘅團隊，例如Gogovan。係人都知，佢同內地公司合併咗，但兩邊係由唔同團隊運作，連公司品牌都唔同（內地叫快狗速運）。結果係，12號當日金鐘站一早關閉，GoGoVan宣佈可以係灣仔義載，直接幫示威人士。

香港同中國內地兩邊市場，係完全唔同「經營規則」，夾硬融合，可以話死路一條。若然分開用兩條獨立團隊，反而河水不犯井水，簡單嚟講，就即係全面落實一國兩制。

第二條路啟發性更大，即使係單一市場，亦可以建制同泛民「通吃」，只要你做好產品，創辦人唔好忽然愛國上身，高談闊論政治，其實係會無事。

以「Tiny微影」玩具車仔模型為例，可以話係最成功例子。雨傘革命後，睇住佢地推出大量懷舊嘅昔日香港產品，例如香港街燈、冰室、懷舊熱水壺，昔日香港情景套裝等，吸引大量「黃絲」幫襯，賺到盤滿缽滿。

之但係，佢地原本賣開嘅警車、消防救護車、懲教海關Hiace，以至警署玩具套裝，就依然大受建制粉絲嘅追捧，兩條product line各有各做，唔需要互相說服對方，咁樣run公司，我認為係相當之聰明。

有人話，政治係講實用性、目標為本，同埋追求最大公約數，其實做Startup又何嘗唔係呢？但當然，創辦人本身要有少少慧根咁囉。

尹思哲
http://linkedin.com/in/wanszezit

investMAN
For People of Style & Substance
掌握理財智慧 感受生活品味
http://facebook.com/investMAN.hk