嚟緊6月15到17號會喺紅館開演唱會嘅張敬軒，最近都忙住宣導佢今次嘅演唱會，早前仲不惜喺個頭上面放火拍海報相，仲喺上面BBQ（新聞連結： https://bit.ly/2G0nNO6 ），今日軒仔又有新搞作喇。

相信有留意開軒仔嘅朋友都知道，軒仔平時喺社交平台同網絡世界非常活躍，淨係玩#hashtag都已經玩到出神入化，而今次軒仔就搵嚟網上最熱鬧嘅討論區之一嘅連登討論區（lihkg）負責人連生（連尼住），同佢一齊搵一啲喺討論區上負評軒仔嘅網民直接用電話對話。

今次嘅玩法就係先由連生透過討論區搵嚟受訪者，聲稱會有一個英皇職員訪問有關張敬軒嘅演唱會，想搵網民俾下意見。貪玩嘅軒仔就緊係充當呢一個「職員」角色，每次都先行扮鬼扮馬令到對方唔認得佢，之後再突然唱歌俾個驚喜fans，當中仲有一個女fans聽到軒仔唱林憶蓮嘅《至少還有你》非常激動，令到軒仔都不禁戲言：「小姐，你拍緊AV呀？咁嘅聲嘅。」

其實張敬軒一向出名親民又玩得，過往都試過同唔同嘅網媒合作同Fans互動，今次更加同出名「兇狠」嘅連登仔交流，不過當網民發現職員嘅真身係軒仔之後全部敗亡，一句負評都俾唔出，最後軒仔得出嘅結論係：「我發現啲網友全部都係精神分裂。」片段結尾更表示有下集，唔知下次有冇網民成功玩番軒仔轉頭呢？

精選娛聞，喺晒《娛果》
http://fb.com/appledailyent