韓國男星宋一國喺節目《超人回來了》入面，對住佢嗰三條化骨龍大韓、民國同萬歲，一直都好慈祥，係間唔時會教下佢哋待人處物嘅禮儀。

不過喺噚日播出一集，宋一國面對打交嘅二仔民國同細仔萬歲，就突然嚴父上身，仲罰兩個囝囝要面壁思過。

事緣係宋一國帶咗三胞胎囝囝，去咗雙胞胎書言同書俊屋企玩，當男星李輝才拎遊戲卡出嚟，同五個BB玩嘅時候，民國同萬歲就突然因為要爭遊戲卡，而追打對方，原本宋一國有抱起民國o氹佢，點知民國繼續扭計，之後宋一國就忍唔住拖咗民國同萬歲入房「伺候」。

當民國同萬歲入房面壁思過時，爸爸就話：「打交嘅話邊個都唔可以有玩具，知唔知？」之後，兩隻化骨龍都好乖咁點頭，仲互攬大家、又錫返大家嚟冰釋前嫌，真係得意到暈。