人夫兼人父嘅「Signal王」王浩信今日周刊爆背老婆陳自瑤(YoYo)同被封「姣Wing」嘅黃心穎喺無錫片場火速撻着，有指婚後嘅王浩信放咗工，仍然好鍾意約朋友去玩，搞到老婆陳自瑤成日同佢嘈起嚟，關係唔係太好。

該周刊指冇咩朋友嘅陳自瑤，雖然有女萬事足，又有老爺、奶奶幫手照顧囡囡，不過邊個女人唔想老公對自己一條心，日前周刊就影到婚後工作量唔多嘅陳自瑤，一支公去咗行街，得老爺同囡囡陪佢買餸，成程個樣都好似悶悶不樂咁。

反而老公王浩信就同黃心穎玩得不知幾開心，日前係因為王浩信墮馬要提早返港求醫，先離開咗劇組，噚日老婆陳自瑤陪老公去睇跌打，被周刊記者問王浩信點解同黃心穎玩得特別埋，王浩信就解釋成個劇組都知佢哋玩得埋，但一被問到黃心穎咁主動，佢都被影到好受落，王浩信話因為我哋演情侶，佢自己唔覺，令本來企喺佢隔離笑笑口嘅陳自瑤火速黑面離開。