今季加咗五次夜賽，密密跑之下，馬匹因體力問題避戰嘅季尾現象提早出現。

今日（13日）頭場新馬賽同第三場一班1400米都出現冷場，馬會亦冇因為跑新馬賽加場，其實多少反映現今馬口數目，未足以應付又長又密嘅賽季，喺從化訓練基地啟用前，馬口好難大幅增加，要應付漫長賽季，可能馬會喺下季賽事編排方面要做多啲功夫。

季尾一班賽得小貓三幾隻報名嘅情況比較普遍，經過季中開始密集式嘅大賽，有狀態嘅馬體力都用得七七八八，好多都要休息回氣，現階段有賽程想跑都有心無力。嚟緊季尾十幾次賽事，基本上一班賽程仍然密麻麻，可能出賽馬都會偏少，馬會編咁多一班賽喺季尾，未必係妥善安排。

中班馬數目較多，相對中班賽唔擔心唔夠馬跑，但出賽馬嘅質素就好參差，好似今日啲出賽馬，就有唔少冇乜表現嘅自購馬，或者季內已經搏咗好多場嘅舊馬，形成好多場都係欠缺重心嘅亂局。呢啲場合隨時乜馬都跑得出，投注者唔容易買中，難怪有啲忠實馬迷都話，睇到個排位表已經覺得厭悶，會自動停賽搵其他節目。

始終今季加咗賽日，同時又少咗兩個馬房，季前都未必預計到季尾嘅情況。不過，下季賽期依然會密密跑，馬會可睇吓下季賽程係咪可以編排得好啲，練馬師因應賽程部署馬匹出賽都冇咁頭痕。

阿Joe