七月十四盂蘭節果然猛料，有關公坐鎮嘅警署亦鬧鬼？八方聽聞深水埗差館，上個禮拜五、即盂蘭節之後第二日凌晨，有警員喺閉路電視，睇到監視扣留倉出現一個着白衫白褲、披住長頭髮的疑似女鬼飄移巡倉，講到似層層。
八方噚晚就傳聞查詢警方，發言人話會了解有冇𠵱件事。傳聞歸傳聞，大家當聽個故仔就算。據聞深水埗警署嘅扣留倉，分左右兩排各有三格，中間由一條長走廊分隔開，個疑似女鬼就喺走廊不時來回巡倉。坐喺值日室一名當值警員睇到目瞪口呆，隔鄰嘅同袍見佢表情怪異問佢：「你冇事吖嘛？」警員口都震埋，同胞順住目光岳高頭睇閉路電視畫面，一睇亦嚇咗一跳，大叫出嚟：「唔係啩……咁猛？」同袍亦都睇到個白色衣衫嘅疑似女鬼喺度飄移巡倉。

男疑犯：唔好嚇我喇

所謂撞鬼好多時出於眼花，過一陣正常番就乜事都冇。冇幾耐警員按時巡倉，當時有六至七個疑犯喺倉扣留緊，大部份係單獨囚禁，警員巡到尾倉，有個男疑犯突然發狂大叫：「唔好嚇我喇，畀個樣我睇吓。」警員問佢發生乜事，疑犯口窒窒咁話，啱啱見到有個影喺走廊飄嚟飄去，所以見到警察都要問番一句，睇吓係人定係鬼，跟住另一個單獨囚禁嘅疑犯亦講：「我……我都睇到污糟嘢呀。」
事後人人都堅持話冇眼花，警署鬧鬼消息傳出，有疑犯因此要求調倉。由於事件太過離奇，警員暫時未敢翻睇錄影帶，況且翻睇要有一定手續，所以都係以不變應萬變。反而有其他同袍為咗更加心安理得，各自戴上平安符，亦有人就話冇做過虧心事，一啲都唔驚。
雖然話每間警署都供奉關公像，應該會鎮住啲邪嘢，有老差骨同八方講，回歸前警帽上嘅港英徽章有個皇冠，呢種皇氣有辟邪功效，但回歸後皇冠換咗紫荊花，令殺氣指數大跌watt。當然，係咪因此導致警界多咗靈異嘢就好難講。
八方記得舊年年中，荃灣差館亦發生鬧鬼奇聞，成班伙記言之鑿鑿，有犯人話喺女羈留室撞鬼，嚇到師姐唔敢單咇巡倉，嗰隻鬼只得半邊身，喺牆角飄嚟飄去，聽落都毛管戙。

mailto:[email protected]