近日特首高調批評環保團體反對填海，引起公眾再次熱烈討論究竟香港應否繼續填海建屋，以增加供應，壓抑樓價。

其實，呢個問題要討論根本係多餘。香港由開埠到依家百幾年，好大部份依家我地用緊既地方根本係填海得番嚟。成個港島北既商業區、新界既新市鎮包括沙田，大埔，將軍澳到東浦、機場等等，隨口講都一大堆，地全部都係填海拎番嚟。如果，香港唔填海，根本無可能發展到今時今日住到700萬人。

如果有人今日先嚟反對填海，其實非常無知。香港土地從來都係短缺，當年港英政府因為人口愈來愈多，決定係新界開發新市鎮，不過無地，於是將成條城門河兩岸填平，甚至依家樓價以升到上天既馬鞍山，亦係填海得番嚟。幾十年後既今日香港一樣面對唔夠地起樓既困境，繼續填海甚至加大填海規模先至係應該要做嘅野。當然填海地點可以討論，不過妄想唔填海，又可以增加供應，世界並無咁兩全其美嘅事發生。

香港既競爭對手新加坡，全國兩成幾嘅地方係填海得到。佢哋嘅政策好簡單，唔夠地就去填，人口增長快，填海拎地嘅速度就要更快，填海填到附近國家連填海用嘅沙石都唔肯賣畀佢。相反，香港仲係度討論應唔應該填海。人口不斷增長，可建屋既土地遠遠追唔上需求。

上咗車買咗樓既就大大聲反對，唔好係我果區填海，填完無左個海景邊個負責？環保人士又反對，怕填海影響生態。政府又弱勢無辦法營造共識，咁你話樓價點可以唔高？

咩路
Fb.com/whichroad

蘋果財經，關心你飯碗
http://fb.com/appledailyatm