前利物浦隊長謝拉特以前踢波都曾經唔止一次喺鬥愛華頓嘅默西賽德打吡入波或者贏波，就算家陣換個角色，以利物浦U18領隊身份企喺場邊教路，結果都係一樣。

利物浦U18禮拜五晚喺Kirkby主場鬥愛華頓U18，呢場迷你默西賽德打吡係落住雨踢㗎。可能係利記傳統嘅關係，利物浦U18班小將喺上半場贏晒控球，但完半場前又係先失波嘅一隊，俾安東尼哥頓射入，半場落後0:1。直至完場前20分鐘，利物浦U18都仲落後緊，但係16歲嘅居迪斯鍾斯連入兩粒，加埋拉菲爾甘馬曹埋齋，幫利物浦U18以3:1反勝對手。

謝拉特賽後話對呢班U18嘅表現感到非常驕傲：「佢哋真係無得頂，今季其他比賽我哋用波都係好好，只係要減少球隊嘅失誤同個人犯錯就OK。如果唔睇愛華頓嘅入波，今場其實係完美嘅，我哋會檢討點解失波，但球波根本反映唔到比賽嘅形勢，我哋係完全主導成場波㗎！」

咦？除咗贏波果part，乜聽落咁似家陣隊利物浦嘅情況嘅？