徐子珊上年8月已經離開大台，雖然同邵氏仲未簽約，不過對方仍為佢安排工作，子珊噚日出席喺馬來西亞搞嘅「霹克幣」盛大的會議，個活動用咗成2500萬港幣去搞，筵席226圍，認真誇張，子珊今日就返香港，喺大馬機場被記者追訪，問佢有關外籍新歡Moni一事，事緣有報道指，子珊新歡係一個六呎高嘅外籍模特兒，叫MoniDemirov，子珊仲打得火熱，買埋機票去西班牙見家長，據知男方亦不時貼出同子珊嘅合照上網大晒恩愛。

子珊喺機場嗰陣，就再次強調Moni係佢嘅下屬，負責做socialmedia同website嘅嘢，佢仲講笑稱：「本來佢真係夠三個月就過試用期，不過佢太靚仔，所以炒咗佢。」

講到佢跟外籍新歡去西班牙，子珊即好大反應：「我冇跟佢!」咁有冇請佢?子珊講：「冇!絕對冇!我哋只係去旅行，本身係朋友。」被問二人合照好親密，佢就大爆「姊妹」係咁，在場記者即嘩然，問佢係唔係屈人，子珊聲線即高八度講：「係咩!你覺得係咩?是但啦!姊妹係覺得會唔會?係囉!」

子珊講到擇偶條件，佢就話對外國人麻麻哋，不過都冇規定會揀邊啲，自己無咩所謂，佢解釋：「但咁耐以嚟，真係冇鍾意一個外國人。」

問到心唔心急拍拖，子珊坦言：「我唔心急，我連簽合約都唔心急。」佢就話自己都有人追，不過覺得唔需要揀住，唔認為一定要結婚，咁多唔多人追?佢就話：「點為止多，點為止少，(三個人以上)冇喇!有嘅實會有，但我未話一定要穩定落嚟，約會一定有，好穩定拍拖，就未搵到一個啱嘅!」