睇見車路士呢排咁勁，美國Youtube channel「Dude Perfect」食住個勢，請咗前鋒艾華路莫拉達，後衛加利卡希爾、馬高斯阿朗素同埋門將泰拔高圖爾斯，參加射門大挑戰，要佢地表演神奇、頂級、超卓嘅射門技巧。

首先登場嘅係卡希爾，佢離門40碼右腳輕鬆拉弓，個波直飛龍門仲成功省中嗰銅鑼。跟住就到阿朗素出場，佢要喺離門30碼嘅位置，將皮球射入籃球籃。就咁聽都覺得高難度，但係阿朗素一野就做到。

之後佢哋就玩筋肉擂台嗰味，將唔同分數嘅車軚擺喺龍門度，然後班球員施射鬥高分。最估唔到嘅係，後衛腳阿朗素竟然鬥贏上仗大演帽子戲法嘅莫拉達。最尾高圖爾斯表演射罰球，嗰波直飛死角入網，睇嚟佢已經擺脫喺社區盾射失12碼嘅陰影。