有線新聞及中國新聞組向來被指做得較為全面，報道亦中肯，過去亦攞過唔少獎項。不過邱達昌喺記者會上，透露有線未來發展方向會強化財經聞，被問是否可理解為重財經輕港聞？及削減新聞及中國組人手？

邱達昌承認有此考慮，佢話﹕「有線新聞不嬲都係有線嘅拳頭產品，我哋會尊重公司同事能夠做到咁嘅水平，我一定會尊重，喺咁多不同products上比較強一個，相信任何股東都會尊重呢段歷史。(調人去經濟新聞？)都會，因為我希望裁員係最少嘅影響，所以我都盡量會希望喺現在嘅資源上去作調動，去開源新嘅希望、新嘅收入。」

問到對電視有冇咩夢？邱達昌笑笑口話：「我對電視係有感情，但希望唔好太羅曼蒂克，如果唔係我就會輸好多錢。」

會做亞視翻版？邱達昌話：「咩叫亞視翻版呢？其實我諗好難，因為同亞視已經係兩個世界，有線仲有寬頻，其實有線嘅發展空間好大，點都好想透過傳媒講，如果唔係新股東...我哋...7億雖然唔係好多錢，你明我咩意思嘛。但應該佢哋有信心，呢4個股東加起埋籌碼都唔少，想講畀未來同事聽，生意有得做一定會繼續支持。電視最大資產就係人才，人才走晒對我哋任何新股東都不利，我哋會好好珍惜。」