37歲台灣作家兼導演九把刀前年被爆同電視台主播周亭羽上汽車旅館，事件轟動台灣娛樂圈！當時九把刀就召開記者會話：「我很喜歡這個女孩子（周亭羽），但愛情選擇上面，我希望未來是跟女朋友。」可惜佢同女友小內都只能維持多半年，最後都係分手收場，但有o依家小三卻變成九把刀嘅真正女友。

今日事件又峰迴路轉，據《台灣蘋果》報導，前晚有人目擊九把刀同周亭羽喺大新莊棒壘球打擊場出現，當時九把刀帶住已經25歲嘅周亭羽玩棒球，後來還玩周邊嘅Airhockey遊戲機，佢哋兩個真係旁若無人咁玩遊戲，搞到好多人都睇到傻咗！畢竟佢哋喺1年8個月前，各有男女朋友嘅時候，雙雙劈腿開房被捕獲，當時俾人鬧到狗血淋頭。

眼見東窗事發，九把刀就透過經理人公開認愛周亭羽：「交往中，謝謝關心！」雖然九把刀能夠大方公開認愛，網民卻未有放過佢哋，有網民更狠批九把刀：「挽回不了就復合小三」、「別在電影裡說專情」、「喜歡搞第三者的，習慣不會斷。」更有網民到周亭羽嘅facebook留言，有人支持佢大膽去愛，同祝福佢。但亦有網民指周亭羽經常劈腿，話佢唔要臉。